اعتزاز احسن کا ای میل اکاؤنٹ ہیک

پیپلز پارٹی کے رہنما اور سپریم کورٹ بار ایسوسی ایشن کے سابق صدر بیرسٹر اعتزاز احسن کا ای میل اکاؤنٹ ہیک کرلیا گیا ہے اور ان کے ای میل اکاؤنٹ سے صدر پاکستان کو خط بھی بجھوایاگیا ہے۔

نہ تو میں صدر کو کوئی ای میل بھیجی ہے اور نہ کوئی خط لکھا ہے۔

پریس ریلیز کے مطابق بیرسٹر اعتزاز احسن کے ’جی میل‘ اکاؤنٹ کو ہیک کیاگیا اور ان کی طرف سے ایک خط صدر آصف علی زرداری کو ای میل کیا گیا ہے ۔ سپریم کورٹ بار کے سابق صدر کا کہنا ہے کہ انہوں نے نہ تو صدر آصف علی زرداری کو کوئی خط لکھا ہے اور نہ کوئی ایسی ای میل بھیجی ہے۔

اعتزاز احسن کے مطابق ان کے نام سے ’فیس بک‘ پر بھی ایک جعلی اکاؤنٹ بنایا گیا اور بقول ان کے اس جعلی اکاؤنٹ کے ذریعے لوگوں کی ایک بڑی تعداد کو پیغام بجھوائے گئے ہیں۔ پیپلز پارٹی کے رہنما نے وضاحت کی کہ فیس بک پر نہ تو انہوں نے خود کوئی اکاؤنٹ بنایا ہے اور اس قسم کا اکاؤنٹ بنانے کے لیے کوئی اجاز ت دی ہے۔

اعتزاز احسن نے اپنے ای میل اکاؤنٹ کو ہیک کرنے اور اپنے نام سے فیس بک پر جعلی اکاؤنٹ بنانے کے خلاف قانونی چارہ جوئی کرنے کا بھی فیصلہ کیا ہے۔ پریس ریلیز کے مطابق اعتزاز احسن نے اس ضمن میں اپنی شکایت کے اندارج کے لیے سائبر کرائمر اتھارٹی سے رجوع کریں گے۔

خیال رہے کہ پاکستان میں مختلف اداروں کی ویب سائیڈز کو ہیک کرنا کوئی نئی بات نہیں ہے تاہم کسی معروف رہنما کی ای میل کو ہیک کرنا اور ان کے نام سے جعلی اکاؤنٹ بنانے کا یہ ایک منفرد واقعہ ہے۔

پاکستان میں اس قسم کے جرائم کے لیے قانون موجود ہے جس کے تحت وفاقی تحقیقاتی ادارہ یعنی ایف آئی اے چھان بین کرتا ہے۔ قانونی ماہرین کے مطابق قوانین کے تحت سائبر جرائم میں قید اور جرمانہ کی سزا ہوسکتی ہے۔