خیبر: ایک اور سرکاری سکول تباہ

قبائلی علاقے خیبر ایجنسی میں حکام کا کہنا ہے کہ مسلح افراد نے ایک اور سرکاری سکول کو دھماکہ خیز مواد سے تباہ کر دیا ہے۔

اس ایجنسی میں پچھلے چند ہفتوں سے سکولوں پر حملوں میں اضافہ ہوا ہے۔

پولیٹکل انتظامیہ خیبر کے ایک اہلکار نے بی بی سی کو بتایا کہ منگل کی رات مسلح افراد نے باڑہ سب ڈویژن سے چند کلومیٹر دور سپین قبر کے مقام پر قائم لڑکوں کے ایک پرائمری سکول میں دھماکہ خیز مواد نصب کیا تھا۔ انہوں نے کہا کہ دھماکوں سے دو کمروں اور چار دیواری پر مشتمل سکول تباہ ہوگیا ہے۔

بعض ذرائع کا کہنا ہے کہ سکول میں آج بروز بدھ فرنٹیر کور کے زیر اہتمام میڈیکل کمیپ کا انعقاد کیا جانا تھا اور بظاہر اس دھماکے کا مقصد مقامی لوگوں کو کمیپ میں جانے سے منع کرنا تھا۔ تاہم سرکاری طور پر اس سلسلے میں کچھ نہیں کہا گیا ہے۔

خیبر ایجنسی میں گزشتہ چند ہفتوں سے سرکاری سکولوں پر حملوں میں اضافہ ہوا ہے اور اب تک اس قسم کے واقعات میں بیس سے زائد سکولوں اور تعلیمی اداروں کو تباہ کیا جاچکا ہے۔

مقامی انتظامیہ ان حملوں کا الزام مقامی شدت پسندوں پر عائد کرتی رہی ہے۔ تاہم ابھی تک کسی گروپ نے باضابطہ طور پر ان دھماکوں کی ذمہ داری قبول نہیں کی ہے۔

یہ دھماکے ایسے وقت پر ہو رہے ہیں جب خیبر ایجنسی میں سکیورٹی فورسز کی طرف سے شدت پسند تنظیموں کے خلاف چند ماہ سے کارروائیوں کا سلسلہ جاری ہے۔ ان میں بعض سکول ایسے علاقوں میں دن کے وقت نشانہ بنائے جاچکے ہیں جہاں کرفیو بھی نافذ رہتا تھا۔

خیال رہے کہ حکومت کی طرف سے یہ دعوے کئی بار کیے جاچکے ہیں کہ باڑہ سب ڈویژن شدت پسندوں سے صاف کردیا گیا ہے لیکن اس کے باوجود سکولوں پر حملوں میں کمی کے آثار دکھائی نہیں دے رہے۔ حکومت کی طرف سے علاقے میں باقی ماندہ رہ جانے والے سکولوں کی حفاظت کا بھی تاحال کوئی انتظام نہیں کیا گیا ہے۔

ادھر فرنٹیر کور صوبہ سرحد کے شعبہ تعلقات عامہ سے جاری ہونے والے ایک بیان میں کہا گیا ہے کہ پشاور کے نیم خود مختار قبائلی علاقے میں کارروائیوں کے دوران تحریک طالبان پاکستان کے دو اہم کمانڈروں کو ہلاک کردیا گیا ہے۔

بیان کے مطابق ہلاک ہونے والے کمانڈر محمد طفیل عرف عبد اللہ اور محمد اقبال تحریک طالبان کاکا صاحب نوشہرہ اور باڑہ کے کمانڈر تھے اور سکیورٹی فورسز کو متعدد جرائم میں مطلوب تھے۔