تلاشی سے انکار، مسافر پاکستان نہ جا سکیں

برطانیہ کے مانچیسٹر ائیرپورٹ پر دو خواتین کو جامہ تلاشی سے انکار پر اسلام آباد جانے والی پرواز پر سوار نہ ہونے دیا گیا۔

مشینوں کو اکتوبر دو ہزار نو میں تجرباتی بنیادوں پر مانچیسٹر ائیر پورٹ پر متعارف کرایا گیا تھا

دونوں خواتین مسافر انیس فروری کو ایک پرواز کے ذریعے اسلام آباد جانے والی تھیں جب انہیں نئی سکیننگ مشینوں سے گزر کر جانے کو کہا گیا۔

ایک خاتون جن کے بارے میں خیال ہے کہ وہ مسلمان ہیں انہوں نے مذہبی وجوہات کی بنیاد پر نئی سکیننگ مشین کے تلاشی دینے سے انکار کیا جبکہ دوسری خاتون نے خرابیِ صحت کی وجہ سے سکینر کے سامنے سے گزرنے سے معذوری ظاہر کی۔

خیال ہے کہ یہ پہلے دو مسافر ہیں جنہوں نے فروری میں اس کو لازمی قرار دیئے جانے کے بعد سے نئی سکیننگ مشینوں کے ذریعے جامے تلاشی سے انکار کیا ہے۔

ان مشینوں کو اکتوبر دو ہزار نو میں تجرباتی بنیادوں پر مانچیسٹر ائیر پورٹ پر متعارف کرایا گیا تھا۔

ائیرپورٹ کے ایک ترجمان کے مطابق ان خواتین کو خبردار کیا گیا تھا کہ، سرسری طور پر انتخاب کے بعد، قانونی طور پر ان کا سکیننگ مشینوں میں سے گزرنا لازمی ہے، بصورتِ دیگر انہیں جہاز میں سوار ہونے کی اجازت نہیں دی جائے گی۔

یہ واضح نہیں ہے کہ آیا دو خواتین ایک ساتھ سفر کر رہی تھیں یا الگ الگ۔

ائیرپورٹ پر تعینات سکیورٹی کا عملہ ایکس رے مشینوں کو جسم کے ساتھ چھپایا گیا اسلحہ اور دھماکہ خیز مواد ڈھونڈنے کے لیے استعمال کرتا ہے لیکن ان مشینوں کے استعمال کو پرائیویسی میں مداخلت کی بنیاد پر تنقید کا نشانہ بنایا جا رہا ہے۔

ایک بیان میں مانچیسٹر ایئرپورٹ کے ایک ترجمان نے کہا ہے کہ ’دو خواتین مسافروں نے، جو ٹرمینل دو سے پرواز کرنے والی تھیں، مذہبی اور صحت کی بنیاد پر نئے طریقہ کار کے تحت تلاشی دینے سے انکار کیا۔‘

’نئے سکینروں سے متعلق حکومت کے احکامات کے مطابق ان خواتین کو جہاز پر جانے کی اجازت نہیں دی گئی۔‘

دونوں خواتین نے اپنے ٹکٹوں کو ضائع ہونا برداشت کیا اور ائیرپورٹ سے چلی گئیں۔

امریکی ائیرپورٹوں پر مسافروں کے یہ سہولت موجود ہے کہ مسافر سیکننگ پر اعتراض کی صورت میں سکیورٹی عملے سے جامہ تلاشی کروا سکتے ہیں۔