شیخ رشید پر حملہ، محافظوں سمیت چار ہلاک

سابق وفاقی وزیر اور عوامی مسلم لیگ کے سربراہ شیخ رشید احمد قاتلانہ حملے میں زخمی ہوگئےجبکہ اس حملے میں اُن کے دو مسلح گارڈ سمیت چار افراد ہلاک ہوگئے۔

تاہم ڈسٹرکٹ ہیڈ کوارٹر ہسپتال کے میڈیکل سپرنٹینڈنٹ کا کہنا ہے کہ شیخ رشید گولی لگنے سے نہیں بلکہ گرنے سے زخمی ہوئے ہیں۔ یہ واقعہ اسلام آباد کے جڑواں شہر راولپنڈی کے علاقے خیابان سرسید میں شیخ رشید احمد کے انتخابی دفتر کے باہر پیش آیا۔

وزیر داخلہ رحمان ملک نے قومی اسمبلی کے اجلاس میں ایوان کو بتایا کہ اس حملے میں چار افرد ہلاک اور دو زخمی ہوئے ہیں۔

ریجنل پولیس افسر راولپنڈی اسلم ترین نے بی بی سی کو بتایا کہ شیخ رشید احمد جو قومی اسمبلی کے حلقہ این اے پچپن میں ہونے والے ضمنی انتخابات میں حصہ لے رہے ہیں، پیر کے روز خیابان سرسید میں واقع اپنے انتخابی دفتر کا دورہ کرنے کے بعد اپنی گاڑی میں سوار ہو رہے تھے کہ نامعلوم موٹر سائیکل سواروں نے اُن کی گاڑی پر فائرنگ کردی جس کے نتیجے میں تین افرد موقع پر ہی ہلاک اور تین زخمی ہوگئے۔

انہوں نے کہا کہ ہلاک ہونے والوں میں محمد انور اور شاہد محمود شامل ہیں۔آر پی او کا کہنا تھا کہ ایک زخمی زحموں کی تاب نہ لاتے ہوئے ہسپتال میں جاں بحق ہوئے۔ زخمی ہونے والوں میں دو افراد کی حالت تشویش ناک بیان کی جاتی ہے۔

پولیس نے جائے حادثہ پر پہنچ کر علاقے کو گھیرے میں لے لیا اور ملزمان کی گرفتاری کے لیے علاقے کی ناکہ بندی کردی ہے۔

شیخ رشید احمد کے بھتیجے اور راول ٹاون کے سابق ناظم راشد شفیق کا کہنا ہے کہ اس واقعہ میں چار افراد جاں بحق ہوئے ہیں۔ اس واقعہ کے بعد شیخ رشید کے حامیوں نے ٹائر جلا کر سڑک بلاک کردی جس کے نتیجے میں ٹریفک میں شدید خلل پڑا تاہم پولیس نے مظاہرین کو منشتر کرکے ٹریفک بحال کروادی۔

قومی اسمبلی کے حلقے این اے پچپن میں ضمنی انتخابات چوبیس فروری کو ہو رہے ہیں یہ نشست پاکستان مسلم لیگ کے رکن حاجی پرویز کے مستعفی ہونے سے خالی ہوئی تھی۔

اٹھارہ فروری سنہ دوہزار آٹھ میں ہونے والے عام انتخابات میں یہ نشست پاکستان مسلم لیگ نون کے سنئیر رہنما مخدوم جاوید ہاشمی نے شیخ رشید کو شکست دیکر جیتی تھی۔

پنجاب حکومت نے ملک میں امن وامان کی صورت حال تسلی بخش نہ ہونے کی بنا پر صوبے میں خالی ہونے والی نشستوں پر ضمنی انتخابات ملتوی کروانے کے لیے لاہور ہائی کورٹ سے رجوع کیا تھا جنہوں نے اس ضمن میں پنجاب حکومت کے حق میں فیصلہ بھی دے دیا تھا تاہم سپریم کورٹ نے پنجاب حکومت کو خالی ہونے والی نشستوں پر ضمنی انتخابات کروانے کا حکم دیا ہے۔

اُدھر مختلف سیاسی جماعتوں نے شیخ رشید پر ہونے والے حملے کی شدید مذمت کی ہے جبکہ وزیر اعلی پنجاب میاں شہباز شریف نے اس واقعہ کی تحقیقات کا حکم دیا ہے۔