رومانوی نژاد جرمن ادیب کے لیے نوبل انعام

رومانوی نژاد جرمن ادیب ہیرٹا مولرکو سال دو ہزار نو کے لیے ادب کے نوبل انعام کا حقدار قرار دیا گیا ہے۔

گزشتہ سال فرانسیسی ادیت ژاں ماغی گُستاو لکلیزیو کو نوبل پرائز دیا گیا تھا جبکہ دو ہزار سات میں ادب کا نوبل پرائز برطانوی ادیب ڈورِس لیسنگ نے حاصل کیا تھا۔

سن انیس سو تریپن کو رومانیہ میں پیدا ہونے والے ہیرٹا مولر نکولائی چاشسکو کے دور میں مشکل حالات کی تصویر کسی کے مشہور ہیں۔

ہیرٹا مولر کا کہنا ہے کہ ادب کا نوبل انعام ملنے کی خبر سن کر وہ ’دنگ رہ گئیں اور انہیں اس کا یقین نہیں آیا۔‘

سویڈش اکیڈمی نے ہیرٹا مولر کی شاعری اور نثر دونوں کی تعریف کی ہے۔

’ان میں بے دخل کیے گئے لوگوں کی حالت زار بیان کرنے بے پناہ صلاحیت موجود ہے۔ ان کی تحریروں میں شاعری کی یکسوئی اور نثر کی بے تکلفی پائی جاتی ہے۔‘

مولر نے رومانیہ کی جرمن اقلیتی سے تعلق رکھنے والے ایک خاندان میں جنم لیا۔ دوسری جنگِ عظیم کے بعد ان کی والدہ کو سویت یونین میں ایک لیبر کیمپ میں بھیج دیا گیا تھا۔

انہیں ستر کی دہائی میں چاشسکو سرکار کی خفیہ پولیس سے تعاون نہ کرنے کی پاداش میں نوکری سے نکال دیا گیا جس کی وجہ سے وہ جرمنی چلی گئیں۔

سن انیس سو بہتر میں جرمن زبان میں چھپنے والے ان کے افسانوی مجموعے کو رومانیہ میں سنسر کیا گیا تھا۔

ان کی ابتدائی تحریروں کو ملک سے باہر سمگل کر دیا گیا تھا جبکہ بعد کے سالوں میں انہیں کئی ادبی اعزازوں سے نوازہ گیا۔

ادب کے نوبل ایوارڈ کے ساتھ انہیں آٹھ لاکھ بانوے ہزار پاؤنڈ کی خطیر رقم بھی دی جائے جو وہ دس دسمبر کو سٹاک ہوم میں ہونے والی ایک تقریب میں وصول کریں گے۔