سڈنی ٹیسٹ میں پاکستان کو شکست

سڈنی ٹیسٹ کے چوتھے دن آسٹریلیا نے پاکستان کو چھتیس رنز سے شکست دے کر تین میچوں کی سیریز میں دو صفر کی فیصلہ کن برتری حاصل کر لی ہے۔

آسٹریلیا نے پاکستان کو فتح کے لیے ایک سو چھہتر رنز کا ہدف فراہم کیا تھا تاہم پوری پاکستانی ٹیم ایک سو انتالیس رنز بنا کر آؤٹ ہوگئی۔

کلِک سڈنی ٹیسٹ کے چوتھے روز کے مناظر

پاکستان کی جانب سے کوئی بھی بلے باز بڑی اننگز کھیلنے میں ناکام رہا اور عمر اکمل انچاس رنز کے ساتھ ٹاپ سکورر رہے۔

آسٹریلیا کی جانب سے نیتھن ہورٹز نے پانچ، جانسن نے تین جبکہ بولنجر نے دو کھلاڑیوں کو آؤٹ کیا۔

چوتھے دن جب آسٹریلیا نے اپنی دوسری اننگز دوبارہ شروع کی تو مائیک ہسی اور پیٹر سِڈل نے نویں وکٹ کی شراکت میں ایک سو تیئیس رنز بنا ڈالے۔ پیٹر سڈل اڑتیس رنز بنا کر محمد آصف کی گیند پر مصباح الحق کی ہاتھوں کیچ ہوئے۔ یہ ٹیسٹ کرکٹ میں پیٹر سڈل کا سب سے بڑا سکور تھا۔

ان کے آؤٹ ہونے کے بعد ڈّگ بولنجر میدان میں اترے لیکن وہ بغیر کوئی رن بنائے دانش کنیریا کی گیند پر بولڈ ہو گئے۔مائیک ہسی نے ایک سو چونتیس رنز بنائے اور وہ ناٹ آؤٹ رہے۔

پاکستان کی طرف سے دانش کنیریا نے ایک سو اکاون رنز دے کر پانچ کھلاڑیوں کو آؤٹ کیا جبکہ عمر گُل نے تین اور محمد آصف نے دو وکٹیں لیں۔

دانش کنیریا نے آسٹریلیا کی دوسری اننگز میں پانچ وکٹیں حاصل کیں
پاکستانی اننگز کا آغاز اچھا نہ تھا اور ستّتر کے مجموعی سکور پر اس کی پانچ وکٹیں گر چکی تھیں۔ بعد میں آنے والے کھلاڑیوں میں سے بھی عمر اکمل کے سوا کوئی بھی بلے باز جم کر نہ کھیل سکا اور پاکستان نے سیریز برابر کرنے کا موقع گنوا دیا۔

سڈنی ٹیسٹ میں آسٹریلیا کی ٹیم پہلی اننگز میں محمد آصف کی شاندار بالنگ کی بدولت صرف ایک سو ستائیس رنز بنا کر آؤٹ ہو گئی تھی۔ اس کے جواب میں پاکستان نے اپنی پہلی اننگز میں تین سو تینتیس رنز بنائے تھے اور آسٹریلیا پر دو سو چھ رنز کی برتری حاصل کی تھی۔

تین میچوں کی اس سیریز کے پہلے ٹیسٹ میں آسٹریلیا نے پاکستان کو رن سے شکست دی تھی جبکہ سیریز کا تیسرا اور آخری میچ ہوبارٹ میں چودپ سے اٹھارہ جنوری تک کھیلا جائے گا۔

پاکستان کی ٹیم: عمران فرحت، سلمان بٹ، فیصل اقبال، محمد یوسف (کپتان) عمر اکمل، مصباح الحق، کامران اکمل، محمد سمیع، عمر گل، محمد آصف اور دانش کنیریا۔

آسٹریلیا کی ٹیم: فلپ ہیوز، شین واٹسن، رِکی پونٹنگ، مائیکل کلارک، مائیک ہسی، مارکس نارتھ، بریڈ ہیڈن، مچل جانسن، ناتھن ہورٹز، پیٹر سڈل اور بولنجر۔